هوى بغداد دجلة والفرات من الحلقة الأولى الى الحلقة الخامسة

Read Time:1 Minute, 25 Second

تأليف واخراج: مهند ابو خمرة

بقلم المخرج عصام الشمري

متابعة العربية 24 نيوز : ماجد لفته العابد

مهند مخرج شاطر ومهم وهذا ما بي خلاف بدليل اعماله السابقة خصوصا بالتايتلات والاعلانات اخرها اعلان (قوي قوي)

ومسلسل هوى بغداد سخيف وسطحي جدا

طيب شنو المشكلة ؟؟؟!!!

اولاً مهند بالرغم من كونه مخرج مهم بس هو كاتب سئ

ثانياً مهند من المهتمين جدا بالترند بدليل الموضوع الي سواه قبل كم يوم ويكولون هذا جان سبب توقف المسلسل لمدة 5 ايام وحسب مصفوفة اليوتيوبب ان الفئة العمرية الي تسوي ترند من عمر 13 سنة الى عمر 25 سنة ولهذا السبب مهند جاي يسوي حكاوي حب تلائم هاي الاعمار وما تلائم المنطق وما بيها اي حبكه او تسلسل زمني ودرامي صحيح

الحلقة الخامسة شوية جانت افضل لكن خربها بجملة (قصة حقيقية) حتى يثير اهتمامنا لكنه اثار اشمئزازنا باستخفافه بعقولنا

المسلسل رتيب وما بي اي ايقاع وكثرة الفلاش باكات هبطت الايقاع اكثر مما هو هابط كل جملة (رومانسية) بين البطلين تنعاد مرتين او اكثر

زهراء حبيب ممثلة شاطرة لكن مرات الحوارات والكاركترات الي مكتوبات ما تعينها حتى تطلع بشكل افضل

علي عجينة هو كسابقه ممثل سئ جدا جدا

ومن الواضح ضعف مهند او عجزه بتدريب ممثليه

مدير التصوير شاطر وصورته حلوه

الازياء كولش حلوة وعاشت ايدج مي حسام خالص (بغض النظر عن السترة الوردية)

المسلسل ما بي موسيقى تصويرية تكون ثيمه للعمل او على الاقل تشد الصورة والميوزك الي مختاريها من مكتبات النت سيئة جداً جداً

الادارة الفنية مرات حلوة ومرات ما بيها اي جهد

الانتاج مو مثل السنة الفاتت دا احس هل سنة اكو تلزيك بغض النظر عن كون الموسم هذا 10 حلقات فقط

ننتظر نشوف مهند بعمل مكتوب بطريقة حلوة حتى نستمتع بعمل جميل

ولحد هنا بعد ما راح اكمل المسلسل انطي وقت لغير عمل

مشاهدات رمضان

About Post Author

admin

وكالة أنباء إخبارية عراقية عربية دولية مستقلة مهتمة بشأن السياسي والاقتصادي والمرأة والطفل العربي على وجه الخصوص تعمل ضد الأنظمة الاستبدادية والتيار السياسي الإسلامي الفاسد , ندعم مشاريع الوحدة العربية ضد المهيمنات الخارجية .

admin@alarabiya24news.com

https://alarabiya24news.com