مسلسل الهروب من الحلقة الاولى الى الحلقة السابعة

Read Time:2 Minute, 7 Second

اخراج: امجد زنكنة .. تأليف: علاء فارس

بقلم المخرج عصام الشمري

متابعة العربية 24 نيوز : ماجد لفته العابد

هذا العمل جان اول تجربة للمخرج كدراما وهاي النقطة تحسب اله لان التجربة الاولى دائما تكون بيها مشاكل ومعوقات خصوصا للي ما تدرج بالعمل الاخراجي مثل ان يكون مساعد مخرج ومخرج منفذ الولد جان مدير تصوير برامج

معالجته جانت بسيطة وبعيدة عن المنطق (واي عمل درامي ارفع عنه المنطق ينتهي) القصة تحجي عن اهل الموصل بس اللهجة جانت بين البغدادية وبين الشروكية (بعمركم شفتوا مسلسل صعيدي يحجون اسكندراني او مصري طبيعي ؟!) بينما هو اول عمل تم التحضير اله من اكثر من 6 اشهر يعني جان عندة وقت ان يجيب شخص من الموصل ويكون مراقب لهجه

انتاجيا العمل ما مصروف عليه بشكل جيد فمثلا د1عش بس عراقيين وعددهم قليل جدا يعني ما شفت اعداد تخليني اكول د1عش جان رقم صعب ويستاهل هاي السنوات من الحرب الي وكع بيها الاف الشهداء

التأليف بي مشاكل هواي وصعب اذكرها كولها بهذا البوست بس الي اتطرق الهم سريعا البطلة مو هي شخصية المسلسل الرئيسية الي الاحداث تدور حولها ولا الها علاقة بالصراع والازمات وحتى حضورها جان بسيط جدا الحوارات بسيطة جدا وما بيها اي حوار فلسفي او تأويلي

طلعوا د1عش كولهم جانوا كبسلجية وسكرجية وهنا لحد يضوج بس داعش منظمة عقائدية (وان كانوا منحرفين وارهابين) لكن يبقون بيهم ناس قافلين عقائديا وجايين من خلفيات دينية متشددة والي يريد يتعلم خل يشوف مسلسل (القاهرة كابول) ويشوف شخصية Tarek Lotfy ويتعلم

وين الاجانب لان المتعارف عليه 60 بالمية من التنظيم جانوا اجانب وعرب شو طالع بس واحد على اساس سوري

وبما انه احنة بخانة المؤلف فالولد ميعرف يمثل اطلاقا واخذ دور زوج البطلة جان مجاملة واضحة و نصيحة خل يبقى بعيد عن التمثيل واذا لزم الامر وراد يمثل خل ياخذ شخصية تشبهه مو ياخذ شخصية متلوكله لان هو الكاتب

ادارة التصوير حلوة وماكو خلاف بابداع ابن غني

الادارة الفنية مو سيئة بس لحد الان مشفت شي ملفت للاهتمام

الازياء والمكياج (صفررررررررر) وين اكو ناس تلبس اربطه وبدون لحايه بهاي الفترة وللي يريد يشوف شغل حلو بهذا الموضوع خل يشوف مسلسل (سهام مارقة)

حجيت وي صديقي Saker Maan Alzakaria يكول بما انه العمل تصور ببغداد فهمه ما مشتغلين اطلاقا على بيئة الموصل وما حسينه باي انتماء للموصل من غير ملاحظات اللغة وبقية التفاصيل الي ذكرتها اعلاه

طريقة تعذيب د1عش رومانسية وراشديات يعني من ترسب بالسادس ابوك ممكن يبسطك بسطة اقوى من عدهم

حسن هادي و سامي قفطان ادائهم عظيم وهنا اثبت الممثل الشاطر من ياخذ شخصية تلوكله وهمه الابطال الحققيين للمسلسل الي جاي تدور حولهم احداث المسلسل

وهذا حدي وي هذا المسلسل بالمشاهدة يحوز ارجع اكمله بعد رمضان بس هسه توقف

About Post Author

admin

وكالة أنباء إخبارية عراقية عربية دولية مستقلة مهتمة بشأن السياسي والاقتصادي والمرأة والطفل العربي على وجه الخصوص تعمل ضد الأنظمة الاستبدادية والتيار السياسي الإسلامي الفاسد , ندعم مشاريع الوحدة العربية ضد المهيمنات الخارجية .

admin@alarabiya24news.com

https://alarabiya24news.com