ثقافة وفن

كمامات وطن ـــ حلقات متفرقة

اخراج: سامر حكمت

بقلم المخرج عصام الشمري

متابعة العربية 24 نيوز : ماجد لفته العابــد

تأليف: احمد مارديني، محمد قاسم، باسل شبيب، رافي وهبه، مازن طه، نور شيشكلي

اغلب الناس تعرف سامر حكمت من اهم المخرجين الشباب ومصطفى اخوه اهم مدير تصوير بالعراق اولاد الدكتور حكمت رئيس قسم السينما بكلية الفنون الجميلة وصاحب اهم واكبر شركة انتاج بالعراق وهاي النقاط ما بيها خلاف

ابتدى سامر كمونتير مهم جدا وكلرست (مصحح لوني) وجان عنده لون مختلف جدا ومميز بده باخراج الاعلانات من 2005 واخرج اول عمل درامي 2019 (شلع قلع)

المتعارف على سامر عينه حلوة ويعرف شلون ياخذ لقطته كونه مونتير فمو مخرج ياخذ لقطات هواي وهاي النقطة تريح الممثل وينجز اسرع لكن حسب اعتقادي عنده شوية ضعف بتدريب الممثل وهذا امر طبيعي اغلب مخرجين العراق عدهم هاي المشكلة لكن مع ذلك هو افضل بهوااااي من هواي مخرجين شباب وشياب ويا ريت لو تجي فرص اكبر واهم ومختلفة عن الكوميديا حتى تصقل سامر ونشوفله اعمال اهم وخلونا نتذكر اعمال بيتر ميمي ببدايته شلون جانت سيئة جدا وحاليا اخر اعماله (الاختيار) لذلك اي مخرج شاب سواء جان جيد او متوسط كون تتكرر تجربته المهم نبطل  نكرر وي المخرجين الشياب الي تجربتهم فاشلة ونبطل نجيب مخرجين عرب (فاشلين) ونبقى مع المخرجين الشباب او المخرجين العرب (المهمين) امثال عادل اديب وديفيد اوريان

وبما انه البطل الاوحد لاعمال سامر هو اياد راضي هذا الانسان الخلوق اياد واحد مو بس من اهم نجوم العراق لا هو واحد من اشطر ممثلين الوطن العربي ومثال زغير على ذلك شوفوا عدد الكاركترات الي يختارها ويطلع بيها شوفوا عدد الاصوات الي ممكن يطلعها حتى تخذم الشخصية ممثل ملتزم داخل السيت ويحترم وقته ووقت الاخرين وعارف حجمه كولش زين

التأليف وهو هذا الموضوع الي سوه ضجة بكمامات وطن

اولا هي الاعمال الفنية بصورة عامة تعالج السلبيات مو الايجابيات فما اعرف ليش واحد يضوج من تتم معالجة حالة سلبية خصوصا انه المسلسل من نوع الكوميديا السوداء

لكن مع ذلك اكو ضعف بالمعالجة لعدة اسباب اهمها انه اغلب الكتاب مو عراقيين وهاي تخلي الشخص الي يكتب مو ملم تماما مثل العراقيين مهما كان اضافة الى ذلك من تذكر بعض الاشياء السلبية (وهو الهدف من العمل) جان ممكن ان نشوف خط ثاني ايجابي ولو بالهامش او بالقفلة

مدير التصوير مصطفى حكمت اني من يكون عندي تصوير ومصطفى وياي بصراحة اكون مطمن للنتيجة مقدماً لان هذا الولد شاطر جدا وعارف وين يخلي لايته بشكل كولش سريع وهذا من اهم مميزات مدير التصوير ومصطفى مسوي شغل حلو مو بس بكمامات وطن لا صراحة بكل اعماله

الادارة الفنية جانت حلوة ما بيها مشاكل

الانتاج جيد لكن من الواضح هل سنة الشرقية بسبب كثرة الاعمال مقلله اغلب الميزانيات

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى