ثقافة وفن

سلسلة ” من وحي الكتاب ” من كتاب “شكون اطرز الما؟!” للشاعر الزجال أحمد لمسيح

صورة

الحلقة الثالثة: إعداد الصديق الأيسري

متابعو العربية 24 نيوز : ماجد لفته العابد

شكون اطرز الما؟ ! ___
الوقتْ اعْطَس
ولْمكان تْشَبَّر ،
الشّعا ينَفَّح
والنْعاس اتَّكْسَر ،
تخَبْلت الكُبَّة ، وما لْقِيت راس الخيط
بغيتْ نغْزل كلام يتصوَّر ،
والمنجج قصيدة
شَفْت صوت ف الخاطَر يتكَوَّر .
اكتب لي :
” اعطيني ولْهْتَك
واستلغى لكلامي ،
بغيت نتْصنَّتْ لعظامي
تـﮔـْهمت مَن الحبشي
بغيت نَتْصالح مْعَ ايَّامي .
بْغيت كهف – فيه نَتْخلوى
طَجِّيت من الزّحمة ،
بغيت نكون بْرا ، وأنا غْلافها ،
جَمْرة ، ونتلحّفْ بالظّلمة .
تحت راسي شِي أمُورات
وخْبال ما تْفُكْها غير الموت
الحياة وردة فيها دودة ،
القْلم ف الدْواية جال
السرَّابة بعَلاَّمها
ولعْمارة مُوجودة ،
هكَّة الضِّيم قال لسيدي مُخّي
وظُلم الدّم ما يتصْرط
خلِّيني مَ الهْديّة والمرْفودَة .”
نغَزْني جَنْبي ،
وُ هَمّي قوَّسْ احْواجبو
السر مغسَّل ، وكفْنو أنا نصاوبو .
هدْرَزْتْ :
” اتّطْلَق يا عقلي وجود
هاذَا زْمان القْرود
فرَّقْ بين ذبّاح ونبّاح
السْكات ردُّوه سْلاح .
……
……
بانْ عَيْبك يا هذاك
ما بقى ليك غير اللّي وُراك ،
كانت التبوريدة رُجْلة وعْناية
واليوم ولات فِيزا للسْعاية
وبان عيبَك .. بان عيبك يا هذاك
ما بقى عنْدك غير اللي وُراك .
…….
…….
فرّق أراسي بين ذبّاح ونبّاح
وُبالي عدّاك ترتاح .
ليل المدينة عْروس مزَوْرة
شَرْبة شادَّة شربة
والموت حاضي اطْرافو ،
خيْل اللّذة ، المُرْ فيها جامح
والضيم مْسَلْطن عَ الخاطر ،
حن لسْلافو .
إيلا بْغيت تدْرك طْلق اللجام
الدنيا ما هي غير والْدَة ،
كل واحد فيها تِيلاد
وْلادتنا يُوم نْتَرْكوها واجْدة .
لا تْثُوب يا عقلي ،
ولا تدير لك عُش تغطَس فيه ،
ابقى جوّال ،
بْقى وْرا مرادك ، ولا تَلْْحق بيه “
الكلام سَاسْ مْدادو
انْفَض سلْهام الورقة وردّو
قالْ شوفْ باب البْياض سدّو
شوف السّالتْ تحت جَلْدو .
الْلغى اكْثر
والناس ساهْتة
حاضرين وناكْرين
وشْكون يْتاوِينا؟!
اللّي فصَّل الْما وطَرْزُو
نـﭭولوا مَا يْواتينا .
اسْمَرْ ، وارْعى حالك
كيف جبْتيه ، كيف جا لك ،
احزم راسَك ، وثَقَّفْ سروالك ،
وانتَ مادْ خْيالك،
مَضِّي همّك وبَرْديه
وجرَّب آش سْوى لك .
ف السَّرْب – الطير يلاغي خوه
وانتَ فْريْخك طارْ لَك .
تغَلْغلْت ، وُ فاضتْ الْخاطر
مللي شفت آش طاري .
العدَّة غايْبة
ﭭلت نْعاود بكْلام عاري .
الكلمة دينْ
واللي فاﭭـَدْناه ، باقي يْماطل
الحل عندهم باركة من الجّينْتي
دْياوْلْكم يصفْقو عْلينا
واحْنا نْكُوماندي ،
المخزْني يتْرَيَّس ، يكوماندي ،
نواقِضْ الوضُو دْ لوْزير تْكوماندي .
الفقيه يلْحَس صباعو من بادّاز الْبيرو
يْحَثَّتْ لـﮔفاف
واحد اعطاه ارْزَيّقْ
ومضَّى ليه العْرَيَّق
يْبيْتو ف غويّر ضَيّق
البوشونات ما تسْمع غير بّاقْ بّاق
يضرب الجّلْد طَاقْ طَرْطَلاَّقْ
واللي نَفْنَفْ يعطيه صَرْمَلاَّقْ .
…….
…….
هَوّدْت لنَفْسي نْفاتَشْ ف الحايْل
لقيتْ الفرْح يْحامي عَ لْربيع ،
ﭭلت راس بلا نشْبة
يتساهل لقْطيع ،
وُدَنْدَنْت
جوج حْمامات يْغنِّيو ، فوق النخلة يْباتو
اللي ما يعْشَقْ الزين يتْعزّى ف حياتو
اللي عندو شي غْزيّل يحُط يدِيْتو عليه
واحد يرهن عُمْرو ولا خُر يوتى لو فيه .
فاﭭـَدْت اللّي جاي
توْلْد لي اللّي فات
ﭭلت آرا العوّادة والطّارة :
كُنت راصد ف الْمنارة
اعْواصَف وامْواج مسْعورة ،
اسْفون مْصيرْها فَ الإشارة
اتْكوفَنْت ، يدّي مقهورة ،
صوت الرّيح اعْمارة
والجَّايْحة منذورة ،
القيّامة قامت بلا إمارة
والخَاطر الحامية ماهي معذورة ،
النّفس ضاقت وسط جْبال الخْسارة
والرّوح طالعة نازْلة مَغدورة .
الناس حبّاتْ التّسبيح
ف يد تْأدّن لِلْويسكي،
الناس اوْراق تلعب بها الّريح
الناس غْيوم على مصيرها تبكي ،
احْميدة يا وْليدي عَدّاك تطّيح
تْولّي اقْوالبي وُ فيك الشيكي ،
يعلْموك الدّصارة
وُكْلام النصارى
يَوْلفوك القصارة
وتَذُّوق ذاك الشّي
وتولّي حْتى انتَ ، آرا ، آرا ….
…….
…….
برّحْتْ
أنا عْروق من الأرض نابْتَة
واعصابي من تْرابْها منسوجة ،
ريحها خيْل تِتْبورد ف صدري
وانا ظَلْ مَن جْبالها،
ملّي تَضّام ، أنا ف بْحورها موجة ،
ملّي تَزْهى ف رْبيعها وتضْرب ،
أنا شَهْقة حالها .
الرباط 1989
—–سيرة أدبية :
• ازداد سنة 1950 بسيدي إسماعيل ( إقليم الجديدة)
• الإجازة في اللغة العربية و آدابها (1977)
• ترجمت بعض أعماله إلى الفرنسية و الهولندية و الإنجليزية (بأمريكا) و الإسبانية
• صدر له 21 مؤلفا ، منها 15 عملا زجليا
• متعاون مع مجموعة من الجرائد و المجلات الوطنية.
• أستاذ الأدب العربي ) سابقا)
• رئيس جمعية ” أعن أخاك ” ( سابقا )
• كاتب عام اتحاد كتاب المغرب (سابقا)
• نائب رئيس بيت الشعر في المغرب (سابقا)
• الأمين العام للرابطة المغاربية للأدب الشعبي ( مقرها في الجزائر )
• عضو مؤسس لاتحاد الأدباء الشعبيين العرب ( مقره في بغداد )
• مثلت بعض أعماله على خشبة المسرح داخل و خارج المغرب
• مستشار وزير الثقافة (سابقا)
• المنسق العام لفعاليات الرباط عاصمة الثقافة العربية لسنة 2003
• المفتش العام لوزارة الثقافة (مارس2001 إلى31 أكتوبر2005)
• غادر طوعيا العمل ليتقاعد ابتداء من نهاية سنة 2005
الدواوين:
*رياح التي ستأتي
*بلادي
*توحشت راسي
*شكون اطرز لما
*حريفات
*ظل الروح
*نجمة
*كلام ضاوي
*ريح الكلام
*خيال لما
*حال وحوال
*بسمة
*أنا ماكاينش
*قتلتني لقصيدة
*توهم أنك عشقت
*استرها بماك
*سطر واحد يكفي
*بين وبين
*بلا عنوان مسافر

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى